英軍小將又贏“波”

英格蘭U21國家隊趁今輪賽事輪空，隨即約戰波蘭U21國家隊進行友賽，希望球員繼續保持良好狀態，不過，既然係友賽性質，而且亦會以試陣為主，相信雙方都會有所保留，但講勝算，英格蘭不但人腳較佳，再加埋主場氣勢，贏波機會極高，捧硬英格蘭贏波贏盤。

占士米拿、侯頓史東、艾邦拉荷及打比舒爾等一班英超新星，近期在球會表現有板有眼，呢班爭住上位的年輕人的確鬥心強橫，而且技術、速度俱備，與以往英格蘭球員已有所區別，所以對住同級球隊顯得較為強勁，難怪在分組賽一枝獨秀，已穩奪出線一席位，今晚雖然以練兵為主，但以英格蘭過去幾仗入球能力，的確值得信賴，分組賽七場攻入對手十五球只失一球，證明攻守都份量十足，即使今晚正副選輪番上陣，以球員平均質素仍然夠殺有餘。

波蘭在分組賽排第三，所壓倒對手只係格魯吉亞及哈薩克斯坦，對住西班牙及俄羅斯的四場比賽全輸，而且零得球，反映出波蘭仍未去到歐洲一二線球隊之中，今晚作客都係輸多贏少。

推介：英格蘭 2:0