巴塞贏波有難度

歐冠盃八強首回合明晚強勢展開，兩大熱門曼聯與巴塞先打頭陣，兵分兩路，紅魔拉大軍到羅馬市捉“狼”，巴塞就作客德甲的“S-4”，今日就先同呢支西甲班霸把下脈，睇下在狀態不足情況下能否打入四強。

講人腳實力，史浩克當然稍遜一籌，不過，又唔好過份睇低呢支德甲球隊，因為陣中擁有唔少夠份量國腳級球員，前線亦有一定級數射手，古蘭恩、艾天托、艾沙莫亞及山齊士等都係射得之人，首仗在自己地頭出擊，只要能把握到入球機會，主場入波唔會太難。

巴塞今季最失敗地方，就係踢作客比賽，周日西甲聯賽作客又輸波，近四場作客賽事確係冇場好睇，何況明晚去到德國根本毫無着數，“細哨”狀態不足，列卡特已經處於放棄態度，更加將“細哨”掛牌出售，今仗上陣機會不大，另一食糊人物美斯又要養傷，攻擊力自然大受影響，預料和波都係巴塞今場目標。史浩克係德甲四強分子，實力差極有條數，而且明知巴塞係歐洲勁旅，知恥近乎勇情況下，必定在主場大打爭氣波，至少可以力保不敗。

推介：和波 1：1