國米殘陣拉素有機可乘

碧咸第一百次為英格蘭上陣，只係踢咗六十幾分鐘，睇返英國傳媒對萬人迷的評價，普遍都唔係好好，有某些仲好惡毒，話要將碧咸放入國家隊的垃圾桶，以後都唔好畀佢再着國家隊波衫。睇完，都幾令人氣憤，碧咸雖則未為英格蘭帶來乜嘢榮譽，但佢往往響重要關頭扮演救國英雄，今屆歐洲國家盃外圍賽，如果唔係嗰個自以為是嘅領隊麥卡倫，當初唔用碧咸，到用返有作用時，又響對克羅地亞的生死大戰中收起碧咸，英格蘭早就出線啦，使搞到今日咁慘。

講返今晚比賽，意大利有場幾關鍵比賽，就係排榜首的國際米蘭作客拉素，同羅馬嘅差距只係四分嘅國際米蘭要奪取意甲寳座，餘下比賽真係唔輸得，否則真係四大皆空就好慘。講實力，國際米蘭肯定響拉素之上，問題係傷兵唔少，部分主力如伊巴謙莫域等自歐冠盃出局後，連帶狀態都冇埋，作客真係好難有信心，何況排第十嘅拉素主場不乏驚喜之作，早前就贏過同市的羅馬，今次主場對回落的國際米蘭仲要受讓半球，絕對博得過。

推介：拉素勝2:1