多蒙特哈化和波格

德甲兩支過氣勁旅多蒙特及哈化柏林今晚聯賽又碰頭，首循環險勝的哈化柏林近況不俗，雖然作客戰績較差，但多蒙特亦冇贏波把握，而且兩隊實力接近，預料都係和波居多，初盤多蒙特要讓平手/半球，當然揀下盤哈化柏林。

多蒙特防線一向都係比較弱，所以在冬季轉會市場重開時，加入哈姆斯及魯卡雲拿加強防守能力，效果亦唔錯，但兩大守將比辛斯卡及魯卡雲拿受傷，又令到防線告急，上仗輸畀雲達不萊梅又再暴露出唔少弱點，若今晚兩位主力亦未能及時上陣，影響相當嚴重，幸好，球隊進攻能力不俗，柏特歷、費爾及華迪斯都有一定級數，今晚主場可以採取主攻。

哈化柏林今季作客成績認真差，兩勝一和七負，所以今晚絕對唔睇好佢哋可以贏波，之不過球隊歇冬後表現穩步上揚，對住同級波絕冇失手，而且班波勝在守得，防守力尚算不俗，今晚踢作客以守為攻啱晒踢法，球隊目前傷兵唔多，大部分主力都可以上陣，其中彭度歷及新加盟的迪亞拉奧祖兩大攻擊手狀態極“弗”，今仗有力與多蒙特一較高下。

推介：和波 2：2