兵工廠趁機謀“利”

阿仙奴與利物浦在歐冠盃打成平手，雖然不分勝負，但一比一比數，等於第一回合對碰利物浦以點數勝出，下星期歐冠生死戰，紅軍一個作客入球兼主場出擊，心理上點都着數得多，阿仙奴要增強下仗爭勝決心，今晚主場再戰紅軍，就要一挫對手銳氣，亦要保住爭雙料冠軍希望，今仗的確冇得保留，誓要全力搏殺爭取勝果。相反，以“賓帥”性格，好大可能今晚一戰稍為迴避，因為“阿四”位置基本上已經穩陣，集中火力攻歐冠次回合方為上策，所以阿仙奴今仗料可全取三分，初盤只讓平手 / 半球，今仗一定捧硬。

事實上，阿仙奴第一擊贏唔到利物浦，真係變成雲格“第一激”，得勢不得分，機會多的是，希比禁區內被侵犯冇吹十二碼已經激氣，而費比加斯畀自己友賓特拿阻住射入空門，更加激到“啤啤聲”，總之場波贏唔到，雲格只可以講句“買吉”。自知首回合和得有運嘅紅軍，下周一戰才係戲肉，避免一班主力受傷或激戰連場而影響發揮，“賓帥”好大機會又以輪換戰術出擊，始終今仗對紅軍重要性不大，阿仙奴可乘虛而入。

推介：阿仙奴 2：0