“米”貴，紅魔食唔起

聯賽錦標在望，歐洲賽霸氣十足，星中之星的C朗拿度又如日中天，目前的曼聯簡直氣勢如虹，今晚作客米杜士堡，以目前充足人腳及狀態，似乎食硬對手，但世事無絕對，足球場上有一金句“波係圓嘅”，始終打過先知。米杜士堡整體實力唔差，自己地頭出戰點都會加多兩錢肉緊，誓要打敗紅魔為榮，初盤受讓一球／球半，如果輸到兩球，點對得住班鄉親父老，一於捧下盤米杜士堡。

米杜士堡班底確係唔差，雖然平均質素不及曼聯，但前中後三線都有實力派球員在陣，麥馬漢、洛甘碧克、達寧、米度及阿利阿迪尼等都係踢得之人，位置上分佈得尚算平均，目前仍需要搶分，希望提早上岸，所以今晚一戰，絕對唔會束手就擒。曼聯在歐冠盃又再顯示出強大威力，C朗與朗尼無堅不摧的攻力，確係擋都擋唔住，今仗當然希望繼續發功，為球隊全取三分，繼續向聯賽錦標進發。不過，明知“雙朗”狀態當起，米杜士堡一班後防必定嚴陣以待，誓將“雙朗”殺傷力減到最低，只要放開踢，相信曼聯都有麻煩。

推介：和波1:1