細哨阿迪國米續前緣？

“國米願意用阿迪換購巴塞嘅細哨！”上個禮拜愚人節期間，傳媒有此“驚天”轉會新聞。當然啦，吹水而已，但至少反映兩個問題：一、細哨狀態之沉，以及與球會之間的互不信任，已到咗一個難以修補嘅地步；二、正喺故鄉聖保羅重尋新生嘅“國王”艾迪安奴，仍然被人寄予厚望。

最新消息，巴塞宣佈，朗拿甸奴喺近日訓練中嚴重受傷，要抖六個禮拜，換言之，“細哨”將缺席今季餘下賽事，宣告收咧。“受傷”消息是否真相，令人懷疑，因為前排巴塞先至話細哨身體狀況良好，究竟係有意隱瞞舊嘅傷患，令細哨個價賣得好啲，定係細哨與球會關係決裂，以“受傷”為由打入冷宮，即使要走都令佢走得無咁風騷？確係耐人尋味。但好多巴塞球迷都感覺到，今次受傷後，唔能夠見到細哨為巴塞效命。

與此同時，前排沉淪嘅艾迪安奴，喺聖保羅逐步尋回射手感覺，至今已射入十球。近日，佢喺南美自由盃更喺臨完場前射入致勝入球，令聖保羅小組出線機會大增。不過，重返歐洲豪門以及重新入選巴西大軍，始終係阿祖最大心願，國米也一直留意住佢狀態回升，聖保羅球會高層亦知留唔住佢，待佢租約七月屆滿，假如阿祖仲keep住而家個勢，國米應該有佢一席。而且，分分鐘可以同細哨再續“前緣”，與伊巴謙莫域等三人組成歐洲最叫對手聞風喪膽嘅鋒線組合。