費倫主場讓得起

周二晚兩場歐冠盃算唔算正路，睇過直播，曼聯同巴塞羅那唔多唔少都係有點運氣，但係能夠在作客的情況下挫敗實力唔差的羅馬同史浩克○四，當中最大差別在於兩隊射手的把握能力，曼聯有狀態大勇的C朗拿度及回勇的朗尼，要入波真係唔難，至於羅馬少咗托迪，就好似無咗進攻靈魂咁，搞到古斯歷、泰迪都好似威力大減咁，再加上門將雲達沙的神勇表現，曼聯贏波真係好合理。受到將帥不和等問題影響的巴塞羅那，面對主場極硬淨的史浩克不單全身而退，重點係贏波而回，十七歲的克傑急速冒升，但要取代朗拿甸奴、美斯，仲有好長的路要走。

講返今晚比賽，四場足協盃都係硬仗，其中意甲費倫天拿主場先撼荷甲燕豪芬，初盤硬讓半球可以一搏。目前在意甲排第四的費倫天拿，因為射手梅圖受傷影響表現，近期的戰績真係好一般，狀態亦唔見得好，但輸波的幾場都係作客，主場出擊依然有一定把握；至於作客的燕豪芬在荷甲幾乎穩奪冠軍，但近期表現同樣平平，五場波只係贏得一場，前鋒化芬、拉索域及高華文斯都死火，更大問題係作客好一般，今次碰上主場特醒的費倫天拿，受讓都信唔過。

推介：費倫天拿勝2：0